Oinarriak

Eusko Jaurlaritzaren liburutegi zerbitzuak eta Galtzagorri Elkarteak, Booktuberboom_+ lehiaketaren edizio berri bat antolatu dugu gazteen artean ikus-entzunezkoen bidez irakurketa sustatzeko helburuarekin. 14-18 urte bitarteko gaztea zara? Youtube, Instagram edo TikToken ibiltzea atsegin duzu? Misio bat eman nahi dizugu: aurkitu zure gustukoa den liburu bat eta irakurri; bideo labur baten bidez liburu hori gomendatu eta youtuben zintzilikatu. Horrez gain, liburu bera Instagarm eta TikToken gomendatu dezakezu. Zu bezalako irakurle gazteak erakartzea lortuko duzula uste duzu? Hala bada, zurea da Booktuberboom_+ lehiaketa! Zatoz eta parte hartu!

OINARRIAK

  1. EPEA

Lehiaketan parte hartzeko epea: 2022ko azaroaren 26a bitarte izango da, eguerdiko 12:00ak arte.

  1. NORK HAR DEZAKE PARTE?

14-18 urte bitarteko EAEko gazteek.

  1. ZER EGIN BEHAR DA?

Liburu bat irakurri, hartu kamera, mugikorra edo tableta eta grabatu liburu horri buruzko iruzkina/gomendioa.

Argitaratu zure Youtube kanalean edo zure ikastetxeko kanalean, eta bete Booktuberboom blogeko parte-hartze orria. Bertan jarri beharko duzu zure bideoak youtuben duen URL helbidea.

Ondoren, Booktuberboom_+ lehiaketan lehiatzen jarraitzeko gogoz bazabiltza, gomendatu Youtubera aurkezturiko liburu berbera Instagramen edota TikToken. Bookstagram kategorian, igo post/argitalpen batean liburua agertzen den argazki bat eta ipini iruzkinetan liburuko zeure esaldi gustukoena. Booktok kategorian, igo liburuari buruzko bideo labur bat, zeure iritzia emanez edo liburuaren sinopsi txikia eginez. 

Oharrak:

  • Booktuberboomen aurkezten bazara booktube bat egitea (Youtuben zintzilikatzea) nahikoa izango da lehiaketan parte hartzeko.
  • Booktuberboom_+ lehiaketara saltoa egiten baduzu, lehenik beharrezkoa iznago da booktube bat aurkeztea eta ondoren liburu hori bera Instagram edoeta TikToken aurkeztea, bietako batean ala bietan. 
  1. BALDINTZAK

BOOKTUBER lehiaketan: 

  • Gazte nahiz helduentzako euskaraz argitaratutako liburu bati buruzkoa izan behar du.
  • Booktubea euskaraz egin behar da. Ez dago euskara batuan egin beharrik, euskalki guztiek dute lekua lehiaketan, baina euskara zuzen eta egoki erabili beharko da.
  • Iraupena: gehienez 3 minutuko iraupena izan behar du eta gutxienez minutu 1ekoa.
  • Aurrez beste inon argitaratu gabeko bideoa izan behar du.
  • Youtuben argitaratu eta Booktuberboom blogeko parte-hartze formularioa betez bidali beharko da bideoaren URL-a lehiaketara 2021eko azaroaren 26ko 12:00ak baino lehen.
  • Ezin da bideo honekin beste lehiaketa batean parte hartu.
  • Bideoak honako informazioa eman beharko du derrigorrez:
  1. Liburuaren izenburua.
  2. Egileen izenak.
  3. Booktuberboom lehiaketan parte hartzeko booktubea dela aipatu behar da.
  4. Spoilerrak ez dira onartuko.
  5. Bideoaren izenburuak honelakoa behar du izan: “Booktuberboom + liburuaren izenburua + Egilea”. Adibidez: Booktuberboom + Gose Jokoak + Izen-abizenak.
  • Bideoak oinarrizko eskubide eta askatasunekin koherentea izan behar du, pertsonen duintasuna eta adin txikikoen eskubideak errespetatu behar ditu.
  • Horrez gain, indarrean den araudia bete behar du, hortaz, ezin dira urratu hirugarrenen eskubideak, bereziki jabetza intelektualarena, ohorearena, pertsonaren eta familiaren intimitatearena eta norberaren irudiarena, ezta hirugarrenen datu pertsonalen erabilerari dagokiona ere.
  • Lehiaketan bi eratara parte hartzeko aukera duzu: PUBLIKOAN edo PRIBATUAN. Pribatua aukeratuz gero epaimahaiak soilik ikusi ahal izango du zure booktubea, baina ezingo duzu publikoaren saria eskuratu. Lehiaketan parte hartzeko modua parte-hartze formularioan hautatu beharko duzu. Gainera bideoa zure booktubeko kanalera igotzen duzunean Ikusgaitza (Publikoa, Ikusgaitza edo Pribatua aukerak ematen ditu Youtubek) bezala argitaratu beharko duzu, bideoaren URL duenak soilik ikus dezan bideoa.

BOOKSTAGRAMER lehiaketan:

  • Booktuber lehiaketara aurkezturiko liburu berbera erabili behar da.
  • Liburua agertzen den argazki bat igo behar da Instagramera, post/argitalpen moduan: bookselfie bat, liburuaren argazki artistiko bat, liburuko pasarte batean kokatutakoa… 
  • Iruzkinean honakoa aipatu behar da:
    • liburuko testu zati gustukoena kakotxa artean.
    • liburuaren izenburua, egilea eta argitalpen urtea.
    • @booktuberboom etiketatu argazkian
    • Honako hashtag edo traolak ipini: #bookstagram, #gazteliteratura…
  • Instagramen argitaratu eta jarraitu @booktuberboom Instagram kontua. Ondoren, Booktuberboom_+ blogeko parte-hartze formularioa betez eman izena lehiaketan 2021eko azaroaren 26ko 12:00ak baino lehen.
  • Epaimahaiak erabakiko du irabazlea.

BOOKTOKER lehiaketan: 

  • Booktuber lehiaketara aurkezturiko liburu berbera erabili behar da.
  • Liburuari buruzko bideo muntaia labur bat igo behar da TikTokera: iruzkina, sinopsi laburra… Musika, efektuak, hitzak sartu daitezke.
  • Iraupena: gutxienez 8 segundu- gehienez 60 segundu.
  • Deskribapenean honakoa aipatu behar da:
    • liburuaren izenburua, egilea eta argitalpen urtea.
    • @booktuberboom etiketatu argazkian.
    • Honako hashtag edo traolak ipini: #booktoker, #gazteliteratura…
  • TikToken argitaratu eta jarraitu @booktuberboom TikTok kontua. Ondoren, Booktuberboom_+ blogeko parte-hartze formularioa betez eman izena lehiaketan 2021eko azaroaren 26ko 12:00ak baino lehen.
  • Epaimahaiak erabakiko du irabazlea.
  1. EGILEAK

Bideoak parte hartzaileek beraiek egindakoa izan beharko du. Jabetza intelektualaren eskubideak lehiaketako parte hartzaileenak izango dira osorik. Bideoan egile batek baino gehiagok parte hartu badu, egileetako baten izenean bidaliko da, baina izen-emate orrian gehiago direla aipatuz.

  1. GURASOEN BAIMENA (behean eranskina*)

Bideoan agertzen diren pertsonen irudi eta datuak argitaratu ahal izateko, adinez txiki diren parte hartzaileen kasuan, derrigorrezkoa izango da gurasoen baimen sinatua eskuratzea. Haiek onartu eta baimendu beharko dute beren seme-alaben irudia agertzen den bideoa lehiaketa honetan erabiltzea eta horri dagozkion blog, web gune eta sare-sozialetan argitaratzea. Baimen eskaera bideoa jaso ondoren egingo zaio lehiakide bakoitzari emailez. Baimena bidaltzen ez duten partaideen booktubeak ez dira lehiaketako kanalean argitaratuko eta ez dira lehiaketan sartuko.

  1. CC LIZENTZIA ASKEA

Bideoak Creative Commons (Aitortu-Ez Komertziala-Partekatu Berdin) lizentziapean argitaratuko dira youtuben. Lizentzia horrek beste erabiltzaileei bideoa berdin partekatzeko aukera emango die, beti ere jatorrizko egilea nor den aitortuz eta helburu ez komertzialekin egiten bada. Lizentziari buruzko informazio gehiago eta youtuben hori nola ezarri ulertzeko azalpenak: blogean (euskaraz), edo https://creativecommons.org/licenses/by-nc-sa/2.5/ helbidean ingelesez.

  1. BIDEOEN eta ARGAZKIEN HEDAPENA

Lehiakideek aurkeztutako bideo edota argazkiak antolatzaileen komunikazio sareetan egon daitezke ikusgai: Eusko Jaurlaritzaren eta Galtzagorri Elkartearen komunikazio digitalerako sareetan. Horrez gain, Booktuberboom blogean ere ikusgai egongo dira, noski.

Halaber, behar izanez gero, parte hartzaile sarituei artxibo originala eskatu ahal izango diete antolatzaileek.

  1. SARIAK

Booktuber lehiaketan, bi motatako sariak banatuko dira (ikusi Sariak atala):

  • Epaimahaiaren sariak:
    • 1. saria: Kamera, mikrofonoa eta tripodea bideogintzan jarraitzeko eta liburu eta diskoetan gastatzeko 200€ko bonoa. Aurkezten diren booktuber guztien artean onena hautatuko du bi adituz osatutako epaimahaiak.
    • 2. saria: GoPro kamera eta liburu eta diskotan gastatzeko 100€ko bonoa. Aurkezten diren booktuber guztien artean onena hautatuko du bi adituz osatutako epaimahaiak.

Diskurtso narratiboa (%30), kalitate teknikoa (%25), originaltasuna (%35) eta ikuslea erakartzeko gaitasuna (%10) hartuko dira kontuan.

  • Publikoaren saria: bi lagunentzako abentura txangoa. Lehiaketara aurkeztutako bideoen artean, azaroaren 29tik abenduaren 10eko 12:00ak arte Booktuberboom booktube kanalean “gustatzen zait” gehien jasotzen dituen booktubearentzat.

*Oharra: zure bideoa ez baduzu publiko zabalaren aurrean bistaratzerik nahi, pribatua izatea nahi baduzu, epaimahaiak bakarrik ikusi ahal izango du eta ez duzu publikoaren saria eskuratzeko aukerarik izango.

Bookstagram onenarentzako saria: mugikorrerako osagarrien kit-a (objetiboa, argia…) + gomendiozko liburu bat.

Booktoker onenarentzako saria: mugikorrerako osagarrien kit-a (objetiboa, argia…) + gomendiozko liburu bat.

  1. EPAIMAHAIA

Epaimahaia haur eta gazte literaturaren eta komunikazioaren alorreko bi adituk osatuko dute. Lehiaketara aurkezteko epea amaitutakoan soilik emango dira aditzera epaimahaikideen izen-abizenak.

  1. IRABAZLEAK

Lehiaketan parte hartzeko azken egunetik (azaroaren 26tik) aurrera, bi asteko epean, abenduaren 10ean, jakingo da irabazleak nor diren. 5 eguneko epean irabazlearekin harremanetan jartzerik ez badute lortu antolatzaileek, saria bigarren geratu den booktuberrak jasoko du, eta hori ere agertzen ez bada, modu berean egingo da segidakoekin ere.

  1. IRUDI ESKUBIDEAK

Parte hartzaileek baimentzen dute euren izen-abizenak eta irudia lehiaketarekin zerikusia duen edo horri buruzko informazioa ematen duten edozein hedabidetan, nahiz Gipuzkoako Foru Aldundiaren eta Galtzagorri Elkartearen komunikazio sare digitaletan argitaratzea. Baita lehiaketa honetan sor daitezkeen hurrengo edizioetan erabiltzeko ere. Baimen honen truke antolatzaileak ez dira ordainsari bat ematera behartuta egongo.

  1. BERTAN BEHERA EDO SARIA HUTSIK

Lehiaketak behar bezala aurrera egiteko zailtasunak izango balitu, Gipuzkoako Foru Aldundiak eta Galtzagorri Elkarteak bertan behera uzteko eskubidea izango dute. Halaber, saria hutsik gera daiteke lehiakiderik ez delako aurkeztu edo parte-hartze baldintzetakoren bat bete ez delako. Ez da antolatzaileen ardura izango parte hartzaileen datuen egiazkotasuna ziurtatzea. Hortaz, datuak ez badira zuzenak eta guztiz osaturik ez badaude, parte hartzailearen ardura izango da antolakuntzak berekin harremanetan jartzeko modurik ez izatea, eta saria galtzeko arriskua ez saihestea.

  1. OINARRIAK ONARTZEA

Lehiaketa honetan parte hartzeak oinarri hauek onartzea dakar. Lehiaketaren blogean egongo dira argitaratuta.